Wanneer die ondenkbare realiteit word kan mens se hele lewe in ‘n oogwink verander. Dit gaan gepaard met skok, vrees en ongeloof. Vir ‘n oomblik kan dit ons laat versteen en woordeloos laat. Dan skop die oorlewingsdrang in.

Wanneer die ondenkbare realiteit word

In 1995 het ek na ‘n motiverings praaitjie gaan luister van ‘n vrou met die naam Alison. Sy is in 1994 as 19 jarige ontvoer deur twee dwelm verslaafde kriminele. Sy het na ‘n kuier by vriende laataand by die huis gekom en was besig om uit haar motor te klim toe die twee haar gryp. Hulle het haar na ‘n strandgebied geneem waar hulle haar om die beurt verkrag, met messe gesteek en keel afgesny het.

Na die brutale aanranding het hulle gedink sy is dood en haar net daar gelos

Alison het volgens haar bomenslike krag gekry en na die pad gekruip terwyl sy met die een hand haar kop in plek gehou het. Met die ander hand het sy haar derms wat buite haar maag gehang het teen haar vasgedruk. ‘n Verbygaande motoris het haar te hulp gesnel en sy het die aanval bo alle verwagting oorleef. Na die aanval en haar verrassende herstel het sy haar storie regoor die wêreld vertel.

Alison vertel haar storie

Dit was ‘n vol burgersentrum die aand met Alison. Sy het vertel hoe sy geen pyn gevoel het nie. Dit was asof sy ‘n toeskouer was. Onder andere het sy vertel hoe die twee geweldenaars met mekaar gepraat het terwyl hulle haar verkrag en aangerand het. So asof sy nie daar was nie. Dis ‘n aand wat ek nooit sal vergeet nie. Alison se woorde Jy kan nie altyd kies wat met jou gebeur nie, maar dit is jou keuse hoe jy dit hanteer sal my altyd bybly.

Sy het ook vertel hoe sy nie baie gelukkig in haar werk was nie en nie kon besluit wat sy eintlik met haar lewe wou doen nie

Na die verkragting en poging tot moord op haar het sy besluit om haar werk te los en voltyds motivering te doen. Sy wil met haar motivering ander bemoedig en versterk. Alison is ook baie gesog in die mediese wêreld waar daar groot agting is vir die mediese span wat haar gered het nadat sy aanvanklik ‘n skraal kans gegun is op oorlewing. Alison het besluit dat sy nie sal toelaat dat die twee boewe haar lewe steel nie.